我的身後事

別擔心，我正常得很，只是節錄了跟Z和C的午間情深MSN對話。

C︰我已經揀左相
我︰咁快？
Z︰係呀，C好樂觀架
C︰一定要揀張自己鍾意架！始終唯一一次
我︰我要好多白色花
Z︰我都要好多花花
我︰我要白色為主
C︰我要開心
Z︰我都要開心，唔準喊
我︰我要每位朋友都講我生平
Z︰吓！講生平好咩？不如播片啦
C︰都好喎，我要播卡通片
我︰我鍾意小丸子
Z︰我要播小忌廉
C︰我想打麻雀呀，好開心架
Z︰好呀，我鍾意打麻雀呀
我︰不如打邊爐啦，我地都鍾意打邊爐
C︰咁不如將破地獄改為BBQ啦
Z︰BBQ打邊爐都唔好，好大陣味架
我︰係呀，佈置我要好多白布白紗
Z︰我要好多花花圍住張相
C︰我要紫色花
Z︰紫色好傷感架
我︰我想加D淺粉紅色花
C︰太陽花呢？
我︰我唔鍾意，白玫瑰就最好
Z︰你地記住呀，我要好多花花呀
我︰我未諗到著咩衫
Z︰未過六十歲要著自己衫，過六十歲就可以著唐衫
我︰我無所謂架，不過無自己鍾意o既衫
Z︰如果唔過六十唔可以著紅衫，會受唔起架。你唔係要著白衫架咩
我︰我唔知呀.. 白衫都好呀
C︰依家唔使諗定著咩衫啦
我︰咁整唔整回禮小禮物好呢？
Z︰唔使啦
C︰係呀，有吉儀架嘛
我︰係喎，吉儀就當回禮小禮物啦，我最鍾意派糖
Z︰仲有壹蚊添呀
C︰仲有手巾仔呢
我︰但係我唔鍾意傳統吉儀封呀，都唔靚，我要訂造
Z︰到時你都死左啦，點訂呀！
C︰可以依家訂定先架
我︰係呀，又唔會過期
Z︰咁咪有排放囉，起碼等幾十年
C︰唔怕，擺得架嘛
我︰係呀，總之我唔要傳統吉儀封啦
Z︰痴線，三個仲生勾勾講D咁o既野！不過我要你地幫我佈置呀…
我︰你唔俾我死先過你架！你幫我佈置就真
Z︰我先呀
我︰我先呀
C︰痴線，死先都爭

係呀，痴線架，我地最少仲有幾十年命呀！